بعزق: أكون أو لا أكون

فى مثل هذه الفترات فى حياتى اتجه إلى التطلع لأهداف بسيطة مكافئات صغيرة كمصدر بسيط للسعادة قد تتمثل فى فنجان قهوة وسيجارة فى الصباح, صفحات من كتاب احبه أو بعض الحلقات من مسلسل قديم، عدد من الأغنى لفرقتي الموسيقية المفضلة. كتابتى هذه قد تكون أحد أنواع المكافئات التى اتحدث عنها لذا اعتقد إنى سأكمل الحديث بالعامية لأحصل على الحرية المطلقة فى الحديث عن هذا الموضوع الذى لم اختر له عنوان بعد ولا اعرف ماهيته فقط شعرت بالرغبة فى كتابة شيئ ما

 صباح الخير, فى الفترة الأخيرة من خلال متابعتى للمسلسل المصرى "الكبير أوى" كوسيلة لتقليل أصوات الصمت فى يومى أو وقت فطارى تحديداً وقفت عند مشهد معين للمثل أحمد فتحى عن دوره لشخصية بعزق أحب اذكر رقم الحلقة قبل ما ابدأ فى الكلام هى كانت الحلقة الحلقة العشرين - الجزء الخامس "أكون أو لا أكون" زى ما ذكر ويليام شكسبير فى قصة هامليت ده مش عنوان الحلقة بالتأكيد بس اعتقد ممكن دلوقتى اختاره يكون جزء من عنوان كلامى الحقلة دى كانت بتدور أحداثها عن إن الكبير وحبة من رجالته اللى دخلوله السجن علشان يساعدوه فى الخروج من السجن فى أكتر من حلقة بخطط مختلفة.. خطة هروبهم فى الحلقة دى كانت هتتم بهروبهم من مسرح السجن بعد ادائهم لمسرحية معينة الهروب بعد مشهد الفينال بعد طفى أضواء المسرح الكالوس هينزلوا فى الكمبوشة -مكان الملقن فى المسرح زمان- وأياً كانت التفاصيل بعد كده مش فارقة فى موضوعى هو مسلسل كوميدى بالأساس.

 بعزق: أكون أو لا أكون وقع اختيارهم فى المسلسل على تقديم مسرحية هاملت وعينهم ماكانتش على أى حاجة غير الخروج لطريقهم للحرية خطة الهروب ماعدا بعزق.. بعزق اخد دور هاملت فى المسرحية والوحيد اللى كان مركز على أداء دوره فى المسرحية وبيتدرب عليه طول فترة تجهيزهم لخطة الهروب يوم العرض أحداث المسرحية بتدور بشكل كوميدى باللون المعروف فى المسلسل لحد مشهد الفينال مافيش نور فى المسرح غير السبوت الموجود على بعزق بدور هاملت وباقى أفراد المسرحية تجردوا من كونهم أفراد فى المسرحية لأفراد فى خطة الهروب نزلوا الكمبوشة فى انتظار بعزق يخلص دوره ويستغل ضلمة المسرح ويجيلهم بمفتاح سيارة نقل خارج المبنى.. بعزق أدى دوره اللى متدرب عليه بقاله أيام وإذا بالجمهور بيقوم يقف ويسقفله على دوره الرائع بالمسرحية فتجتاحه فرحة ماحسش بيها فى حياته قبل كده كفيلة تنسيه خطة الهروب اللى مستنينها تتنفذ بفارغ الصبر ويلاقوا طريقهم للحرية من خلال الكمبوشة -الموضوع مضحك بعض الشئ إنك تاخد حريتك من خلال حاجة اسمها الكمبوشة بس ماعلينا- بعزق يحصل على جائزة أفضل ممثل تجتاحه فرحة عارمة تتسبب فى تخريب خطة الهروب على الكبير ورجالته

هل كان فى معزى معين من المشهد ده ولا مجرد مط فى أحداث المسلسل من الكتاب؟ من الحاجات المحببة ليا هى الغموض أو العشوائية فى أحداث معينة بدون توضيحها أو فرض وجهة نظر معينة على المشاهد زى كل حاجة فى الحياة فبالتالى مش هفرض وجهة نظرى واقول بإنها المقصودة لكن هعرضها واديلك فرصة التفكير فى كل حاجة بشكل تانى

 sometimes words have two meanings زى ما Led Zeppelin كانوا بيقولوا هل تقدر تعد عدد المرات اللى كنت فيها فى نفس حالة بعزق مرة اتنين عشرة أو ماجاتش لسه؟ تحول بعزق فى لحظات من شخص غير مهتم غير بإرضاء غرايزة الحيوانية من أكل وشرب وغيره لشخص أدرك إن له قيمة فى مكان ما. من شخص بدون غاية لشخص له غاية فى حياته بعزق لقى نفسه فى حاجة لأول مرة فى حياته من لحظة وجوده لحد اللحظة دى نسته الهدف اللى كان جاى ليه السجن من الأول الهدف اللى ماكانش بإختياره وكان هيرجع لحياته القديمة بدون أى هدف اتحبس بين علامات تنصيص "أكون أو لا أكون" إلى أن قرر أنه يكون ولو للحظات.

قد يكون الكاتب استخدم بعزق كتشبيه للحظة أنت لاقيت نفسك فى حاجة معينة أو بعزق مجرد مط فى الأحداث مش أكتر لكن الإجابة عن حاجة زى دى مش هتفرق كلامى.
كلامى  قد يبدوا بديهى للبعض لكن مش ده الهدف اللى بذكر بيه المشهد أو القصة دى.. أفكار مماثلة زى دى بيتم عرضها فى أعمال سينمائية عظيمة ليها بصمة فى تاريخ السينما لكن الغرض من كلامى ده هو إنك ممكن تلاقى المتشابهات دى فى أعمال بتتصنف على إنها أعمال ترفيهية أو كوميدية حاجة تتفرج عليها وأنت بتاكل أو تملى بيها بعض الفراغات زى ما ذكرت فوق.
 قياساً على ده كل حاجة حوليك من أحداث فى اللى هيشوفها بشكل سطحى أو شكل يناسب فكرة مسيطرة عليه أو برؤية واضحة.

ده يفكرنا بالإكتشافات على مدار التاريخ من أكتشاف المغناطيس, تفاحة نيوتن, ماكسويل والإلكتروماجنيت وغيرها والإختلافات فى طرق التفكير فى نفس الحاجة
 تعالى ناخد قصة نيوتن اللى كانت بتتحكيلك فى المدرسة بنفس القفلة الكليشيه إنك لو مكانه كنت هتاكل التفاحة بدل ما تفكر تفكير وإنه دليل على ذكائه عنك بدون ما يحط فى الاعتبار إن نيوتن كان من الحالة التانية اللى بتكلم عنها وإن وجود فكرة مسيطرة عليه هى اللى خلته يفكر كده مش علشان هو أذكى منك أو حاجة.

 فوسط وجود أهداف وطرق عشوائية لكل حاجة إلا إن مخنا اللى بيخترع نمط لتفسير ده بناء على الطريق اللى اترسمله.. زى ما خلقتلك بعزق دلوقتى كkeyword بشكل غير مباشرماقدرش أقولك مين الأحسن لكن ممكن ترحب بوجود بعزق فى حياتك دلوقتى